Yossi Lhungdim
Le'ilui Nishmat Avner Ben Avraham, Khana Lhanghal Bat Sarah, Ngahlhing Bat Sarah ve'Shifra Bat Zimra. Tihyeh Nishmatam Tzrorah Bitzror Hakhayim
וַיִּסְעוּ מֵרְפִידִם וַיַּחֲנוּ בְּמִדְבַּר סִינָי ,וַיִּסְעוּ מִמִּדְבַּר סִינָי וַיַּחֲנוּ בְּקִבְרֹת הַתַּאֲוָה
Vayyisa'u mirfidim vayyakhanu bemidbar Sinai; Vayyisa'u mimidbar Sinai vayyakhanu bekivrot hata'avah
(Refidim a kuon akitol uvin Sinai gamthip mun'a ngahmun asem uve; Sinai gamthip a kuon akitol uvin Kivrot Hata'avah mun a ngahmun asem uve …)
~ Bamidbar 33:15-16
Ipu-ipa tehou Egypt a kuon ahung potdoh uva, gamthip-gam a kum 40 anavaitham sung uchun ngahmun 42 jen mun chuom-chuom a anasem uve. Tuchung Parasha ivet leh Torah in hiche ngahmunho se'se chu gollhahna ahung nei in ahi.
Langkhat a Torah iti tieng lungsung tongkha thei chule ngainom um tah-tah thusimho kisutna lekhabu ahipoi. Hinlah P-thien a kuon thupeh le daan-le-moul ho kisutna lekhabu ahijo'n ahi. Chuti ahileh ipi ding'a Torah in hiche ngahmun 42 hohi ahung gollhah a hintem? Tidan chu Daan-le-moul tamtah Torah she'biktav a kisun talou'a Torah she'be-alpe a kuon kijil a ahitauve. Tekahna Shabbat ni'a bolphallou 39 Av Melakhot ho bang chu Torah she'be-alpe pansan a drash kipe'a kijildoh a ahiuvin ahi. Chuti ahileh hiche ngahmun 42 ho asut sang chun Torah in 39 Av Melakhot ho joh hi hungsun hen lang, hiche hohi Shabbat ni'a bol phallou melakhot ho ahi tileh phajieng a hilou ham? Chuma bang'a chu thildang-dang poimo tah-tah sutthei tamtah akisuntalou um a ahiuve. Ipi ding'a P-thien in alekhabu Torah sung'a chu Am Israel te ngahmun semna mun 42 hochu ahung jaosah khel-khel a hintem?
Midrashei Khazal ho ivet leh Khazal ho'n hiche ithudoh u toh kisai donbutna tamtah ape uvin, aboncha sutna ding hun-le-phat chule mun aumlou toh kilhon in hiche thudoh toh kisai'a Khazal ho thusei poimo tah khat veuhite. Khazal ho'n aseinauva ngahmuh 42 ho'a kuon a hi P-thien in achate - Am Israel techu ichan a anangailut em ti mudoh thei ahi atiuve. Chuna ban'a Egypt a kuon hung potdoh ipu-ipa tehou chu ichan a Tzaddikim hiuva chuleh kithungai uva ham ti jong mudoh thei ahi ti'n asei uve. CHuleh hiche teni jaal'a hi Torah in hiche ngahmun 42 hohi ahin sut'a ahi ti ahi.
Ahileh hiche ngahmun 42 ho'a kuon a hi P-thien in Am Israel te angailut dan le alungset dan, chukit leh Am Israel te chonphatna le akithungaina u mudoh thei a ham? Midrash Tankhuma a Khazal ho'n aseinauva P-thien in Am Israel te angailut jeh'a hiche ngahmun 42 hohi Torah a ahinsut a ahi. Hichu ipi toh kitekah em itileh Leng khat hin chapa changkhat, tahsa dammo-veisetna sangtah nei khat hi anei in ahi. Nikhat achapa damna ding ti'n mun gamlha tah'a um Doctor khat heng'a agapui tai. Achapa adamjou'a ahung kinungle lhon chun lamkah lah'a apa'n achapa jah'a,"Hilai mun a hin na imu in; hilai mun a hin dap in nahin man in; Hilai mun a hin naluchang ana'n " ti'n masang'a thilto lhon hochu avel in aseipeh e.
Rashi Hakadosh in aseina a ipu-ipa tehou chu gamthip-gam'a kum 40 sung vaitham diu tihi khet hameraglim jeh'a P-thien a kuon gezera hijieng tajong leh P-thien in donlou-dailou in anakoi dehpoi. Ngahmun 42 asem vang uvin P-thien in achung uva khotona ananei in, hiche kum 40 sung chun adei-angaichat ho jouseu abon in akivat imacha jong umlou hiel in anasuhbulhit peh soh kei uvin ahi. Hiche P-thien in ei ngailutnau hetjing na ding'a chu, Midrash Tankhuma a Lengpa le achapa changkhat kisei bang'a, Torah in ngahmun 42 ho ahin gollhah a ahiye.
Khazal ho'n aseinauva hiche ngahmun 42 ho'a kuon P-thien in ei ngailutnau le ei khotonau geldoh jing jieng'a chu'a kuon Torah le Mitzvot ho phatecha jui jing ding le suhbulhit kigot jing ding ngai a ahi ti'n aseiuve.
Chuleh Midrash Tankhuma ma ivet a ahileh Khazal ho'n aseinauva hiche ngahmun 42 ho'a kuon ipu-ipa tehou chonphatna le anakithungai dan u mudoh thei ahi ti'n asei uve. Henge, khatvei-vei le anakiphin uvin, P-thien jieng jong analunghansah uve. Hinlah ipu-ipa tehou chu "kelngoi ho'n kitoh tah'a kitol lele a, kelgnoi chinpa in apuina lang-lang a kitol " toh tekah in aum uve. Kum 42 sung'a ngahmun 40 jen anasem uchu mun khenkhat a chu nikho 1 ham bou um u, mun khenkhat a chu ahikit leh alha-alha a um u, mun khenkhat kit'a chu akum-akum a aumnau jong umdalou – chuta chu anakitol lele uva ahi. Hinlah khatvei jieng jong hiche jeh chun anaphun uvin, anakiphin kha pouve. Kitol taute ti'a thu ahung kisei leh avon hou akigot uva kitol jieng u; hilai mun'a hi ngahmun sem ute ti thupeh aum a ahileh von ho asolhah uva, aponbuh hou atun uva, akisei taphot chu phunlou hiel'a kelngoi ho'n ho bang'a kelngoiching'a pang teni – Moshe Rabbeinu le Aharon hakohen nung-nung chu anajui uva ahi.
Mihem million ijat ham, nei-le-gou, sum-le-pai chule gancha tamtah toh kitol lele ho ding'a munkhat a nikhat ham bou ngahmun sem ding, ajing nikho le dalhah pai ding kiti chu igel'a ahileh thilbailam ahilou ding hetsa ahi. Chubep hilou'a gamthip-gam a um ipu-ipa tehou chu "hilai mun a hi nikho hijat ium diu ahiye" ti ima hetmasat umlou anahi'n, meibol lom "amud ha'anan" kitol dungjui'a chu kitol uva anahi'n ahi.
Aipi chu hileh hichu atum in koidoh tadi leuhen. Tuchung Parasha a ngahmun 42 hohi ivet a ahileh amun bep hilou'a chuche amun'a thilsoh hotoh hung kisuttha jiuva ahiuve. Vetsahna a Elim mun'a chun twisam 12 aum in, lusu phung 70 akeh e ti'n akisun in; Refidim mun'a chun twi don ding aum poi ti akisun in; Hor Hahar mun a Aharon thi thu akisun kit in….chutichun amun toh kitoh'a thilsoh ho akisun soh kei e. Hinlah kidang tah in Sinai mun'a ngahmun asem u chungchang kisutna chu ivet leh "chulai mun a chun P-thien aheng uva ahung kilah in, Am Israel te'n Torah anakisaan uve" ti akiminphah tapoi. Vaan-le-leiset chuleh asung'a um thil jouse hung kisem a kipat nikho loupi pen le thilsoh loupi pen tithei Matan Torah chu ipi atileh kisun lou a hitan tem?
Hiche thudoh ihin hilchet tieng uleh akicheh theina ding in thildang khat ve masaleuhen.
Kut pi hohi ahun le aphat u atamjo Torah a phatecha kijih soh kei ahiuve. Hijieng jong leh hiche Kut pi holah'a khat chu kidang tah in Torah in anikho le aphat kichihsel in asun poi. Hichu Shavuot ahiye. Pesach, Rosh Ha'shanah, Yom Kippur, Succot le adang dang hohi "chuche lha, chuche nikho leh..." ti'a kichihsel a Torah a muthei a kisun ahin. Hinla Shavuot vang Pesach Yom Tov Rishon kichai ni akipat "hapta 7 lhingsel nasim diu.." ni 50 lhinni chu nikho thieng hiding ti ahi. Chuti ahijeh chun Shavuot hi 6 Sivan ni'n jong alhung thei in, chujong leh 7 Sivan ni'n jong achuthei e.
Iti dan in em? Malai'a Sanhedrin ho anadin lai uva chu Lha thah hi Witness ding Mi 2 aum tieng anaphondoh jiuva ahin. Hiti a chu khatvei tieng Iyar lha khu ni 29 hiji, khatvei tieng ni 30 hikit ji ah ahi. Hiche kisei hi kum dang dang sang'a "Shana Meuberet" kum tieng leh ana hinuom dehset ji a ahiye. Ahileh Iyar lha khu ni 29 ahitieng, Omer kisim ji pahi Sivan lha akhu nikho khat hung tamjo ji a, Shavuot hi Sivan tarik 7 a chuji ahitai.
Hinla ihet diu khat chu tukhang'a Shavuot hi 6 Sivan bou'a chuji a ahitan ahi. Ajehchu Sanhedrin adin tahlou phat a Lhathah nikho ho phondohna jong hi Halakha dungjui tah'a ana umthei tapo'n. Chuphat chun Hillel Ha'nasi kitipa'n ( amahi Hillel Ha'zaken toh thakhat ahipoi ) Calendar hi Calculation dungjuiya ahin gontoh a, chu kalse lha a nikho umjat hojong kikhel talou uva, Iyar lha ahi ni 30 umjing a ahita'n ahi.
Chule Sinai muol a Torah kipeh nikho chung thudol jieng'a jong Khakhamim ho kikah'a kinielna ana um e. Shavuot nikho kichehsel a akisutlou bang in Torah kipeh ni jong anikho kicheh tah in akisunpoi. Khenkhat in Sinai muol a Torah hung kipeh nikho chu 6 Sivan ahi atiuvin, khenkhat in 7 Sivan joh ahi atiuve. Gemara sung a kinielna saotah aum in ahi. Hijong leh hichu eihon isei nuom pen uvang ahisampoi.
Eiho'n isei nuom pipen uchu "Ipi ding'a Kut dang ho bang'a Shavuot hi anikho kicheh tah'a Torah a kisun lou ham?" ti hi ahi. Leiset khangthusim a ding'a nikho loupipen, P-thien amatah Israel te masang'a ahung kilah nikho chu ipi atileh Torah in kicheh tah'a ajihdoh lou hitan tem?
Khakhamim ho'n hitin eihil uve: Torah kipeh ni, Shavuot nikho loupi chu kicheh tah in Torah a akisun tapoi. Ajehchu Torah kiti hi Phat ( Time ) in akaan khahlou, kichai tih neilou'a tuonsot a um jing jieng ahijeh ahi.
Chuleh hiche hin eihilnuom uchu ipi ham itileh Torah kipeh ni, Shavuot nikho chu 6 Sivan a anop le chuthei, anop leh 7 Sivan a jong achuh thei bang'a Torah simna ding kiti jong hin phat atum in agachuom neipoi.
Hichun avetsah chu hun le phat jouse hi Torah twi-thieng a kidii na ding'a phat lemchang ahiuve ti ahi. Mi khattou chun Torah kiti chu pungkah hijat, lha hijat, kum hijat kasim ta'n, ahuntai ati thei ahipo'n; ahinkho lhungkei a asim ding ti avetsah kit ah ahi.
Chukit leh Shavuot hi "Khag Matan Torah" - Torah Kipeh Nikho ti'a kiminvo a, "Khag Kabalat Torah" - Torah Kisaan Nikho akitilou bang a Torah kiti chu nikho seh a athah beleh a eikipeu tobang ahin. Asaangnuom chan chun "Kachonse vaal ta'n, keiya ding in aphat akikhel ta" tilou'a, lunglha dai lou hiel'a akisaan jing thei ding tina ahi. Ajehchu Torah le athu-hing hohi phat in akaan po'n, Shavuot jieng jong Khag dang ho bang'a Torah in ahun le aphat "hiche nikho le" ti'n ajih po'n ahi.
Tu'n chunglang'a ithudoh uva kinung choplut kit aleuhen. Hagaon Rabbi Dov Eliezrov in hiche ithudoh u toh kisai chun hitin asei e: Torah in ngahmun 42 ho ahin sut'a, chuleh ngahmun khenkhat a amun toh kitoh a thilsoh ho ahin sut hi ivet a ahileh a pshat dungjui'a khonung'a jildoh thei ding ima umbehlou ho ahiuve (sod tichu Kabbalah dungjui'a ivet ding'a ahileh henge vetsah umsoh kei ahinauve). Hinlah hitobang thil chu anasoh a ahitah toh kilhon a eiho'n igeldoh jing diu deina'a hung kisun a ahibou uvin ahi. Langkhat a Torah kiti chu tonsot a ding'a hung kipe ahibep hilou'a Khazal hon aseima bang uva mikhat chun niseh leh Torah chu "chuche nikho mama'a hung kipe" tobang a agel'a athah beleh'a akisaan jing ding ngai a ahi. Chuti ahitoh kilhon a Torah hung'a ngahmun 42 ho ahung sut'a, Sinai gamthip mun ahung minphah a chu chulai mun'a thilsoh – Matan Torah chu ahung sutlou a ahitai. Ajehchu Kaballat Ha'Torah – Torah kisaan ding kiti chu hun-le-phat in akaanlou; janhi, tuni le jing – itih phat lai hijieng jong leh akikhehna ima umlou a ahi. Chuti ahitoh kilhon a phatchesa a thil anasoh ho geldoh jingna ding bouseh a hung kisun thil holah'a chu kisun theilou a ahita'n ahi.
SHABBATH SHALOM LEKULAM
Comments