top of page
  • shivteimenashe

Parashat Matot (Kuki)




Avrekh Yossi Lhungdim

Le’ilui Nishmat Avner Ben Avraham, Khana Lhanghal Bat Sarah, Ngahlhing Bat Sarah ve’Shifra Bat Zimra. Tihyeh Nishmatam Tzrorah Bitzror Hakhayim

אִישׁ כִּי־יִדֹּר נֶדֶר לַיהֹוָה
Ish ki yidor neder la’Ad-nai
(Mikhat chun P-thien ding’a kitepna/kihahselna anei leh…)
~ Bamidbar 30:3

Parashat Matot kipatna ivet leh Moshe Rabbeinu in Am Israel sung’a phung-lamkai “rashei matot” ho ahoupi’a, mihem khat kamcheng’a kuon hung kondoh kitepna/kihahselna - neder toh kisai P-thien a kuon thupeh chuleh daan-le-moul hochu itobang hiuva ham ti aseipeh thu akisun e. Chuna ban’a hiche kitepna/kihahselna kiti chu ichan a khamur a, mikhat chun hiche akhamcheng-soh thil kitichu asuhbulhit ding ichan a poimo em ti jong akisun in ahi.

Parasha ivet leh hitin akisun e: Ish ki yidor neder la’H’ o hishava shevuah le’esor isar al nafsho lo yakhel devaro kekhol hayotze mipiv ya’ase (Bamidbar 30:3). Mikhat chun P-thien ding’a kitepna/kihahselna anei tah’a ahileh akitepna chu palkeh ding go hih beh henlang, akamcheng’a kondoh bang chun bol hen ti ahi.

Aipi hileh achomlam pen’a sei ding’a hiche Neder toh kisai’a Torah in aseinom pipen chu kitepna/kihahselna moh nei-nei lou ding; inei tah’a ahileh ikam’a isei pachu suhbulhit kigot tei ding; isuhbulhit thei tahlou ding’a ikitepna/ikihahselna chung’a chu kisihna inei’a ahitah leh hatarat nederim bol ngai ding. Chuleh iham ti’a mikhat chun chuche akamcheng pachu hatarat nederim umlou’a asuhbulhitlou kalse Torah dungjui’a suhkhel/bolkhel a kisim peh a ahinalaiye.

Langkhat a hiche achung’a pasuk hi ivet a ahileh kushiya ijat ham hetthiem hahsa dohthei aum in ahi. Amasapen a ipi atileh Torah in “Ish ki yidor neder la’Hashem o hishava shevua…” ti’a “yidor neder” ahilouleh “hishava shevua” ti’a “neder “ (kitepna) le “shvua” (kihahselna) thucheng teni hi vel 2 ahin sut a hintem? Tidan chu “Ish ki yidor la’Hashem o hishava…” ti’n sun tajong leh kicheh a ahitai. Chuna ban’a ipi atileh “la’Hashem” ti’a “P-thien a ding’a” ti’a ahin belap hintem? Kitepna kiti chu P-thien a ding um’a, P-thien a lou ding um khattou a aham? Chukit leh iti dan a “lo yakhel devaro” (akitepna chu palkeh dahen – hiche hi Negative Commandment ahi) ti’a asut jou’a “kekhol hayotze mipiv ya’ase” (akamcheng a kondoh bang chun bol hen – hiche hi Positive Commandment ahiye ) ti’a ahinsut kit a hintem? “Akitepna chu palkeh dahen” ati tah’a ahileh “akamcheng’a kondoh bang chun bol hen” tina hijieng a hilou ham?

Hiche ithudoh u kushiyot hohi Ohr Hakhayim Hakadosh in adong in hitin hilchetna ape e. Ama’n aseina’a “yidor neder” le “hishava shevua” ti’a Torah in “neder” thucheng le “shevua” thucheng vel 2 ahinsut hin vetsah anei ahi ati e. Ravpa’n aseina a Kitepna/kihahselna kiti hi jaat 2 aum e. Amasapa ahileh mihem lhagao lang thil toh kisai ahi’n, anina ahileh tahsa lang toh kisai thil ho chung’a kitepna/kihahselna ahiye.

Lhagao lang toh kisai kitepna/kihahselna iti tieng Torah le Mitzvot hotoh kisamkaina nei ahiuve. Tekahna a Torah kasim pan ding ahitai; Charity hijat hi lhaseh leh kapeh ding ahi; Torah in aphallou kabol jing hohi kangah ding ahitai ti’a kitepna/kihahselna chuleh adang dang.

Langkhat a tahsa lang toh kisai kitepna/kihahselna iti tieng Torah in “bol in” ti’a aseina jong umlou, “bol hih in” ti’a aphallouna jong um dehlou a ahi. Chuleh hiche tahsa lang toh kisai kitepna/kihahselna hohi jaat 2 a hopkhen son thei ahikit uve. Amasapen a neh-le-don, sil-le-chen, mun-le-muol toh kisai’a “Kabol ding ahi” ti’a kitepna ho ahiuve. Anina a ahileh neh-le-don, sil-le-chen, mun-le-muol toh kisai’a “Hiche ho a kuon kakikangse ding ahi” ti’a kitepna/kihahselna anei ho ahikit uvin ahi. Hilai mun’a kitepna/kihahselna kinei hohi Torah in akhamna umlou, “nabol a ahileh Mitzvah ahi” atina jong umdehlou, hinlah mikhat chun kitepna/kihahselna anei’a kuon ama ding’a “asur” sohdoh thei uva ahi.

Vetsahna a “Hiche von hi avel’a kavon kit tahlou hiel ding ahi” ti’a isei khahtah leh hiche kitepna ineina von chu hatarat nedarim inei lou laise asur ahijieng e. Chuma bang’a “khulai mun a khu kanungche tahlou hiel ding ahi” iti jong leh chulai mun chu ei’a ding’a asur ahikit in ahi.

Tuchan’a isei hou – Lhagao le Tahsa lang toh kisai kitepna hochu hiche “yidor neder” le “hishava shevua” chun ahung vetsah a ahi. Chuta chu hiche “neder” le “shevua” thucheng vel 2 hung kisun teni chun lhagao lang le tahsa lang toh kisai’a kitepna/kihahselna avetsah toh kilhon a Torah hung’a “la Hashem” – P-thien a ding ti jong ahung belap’a ahi ti’n Ohr Hakhayim Hakadosh in asei e.

Ahileh hiche kitepna/kihahselna jat 2 aum man’a chu ipi atileh “la Hashem” chu ngai a ham? Hiche thudoh hi hilchien leuhen i-kushiya doh u athumna – “lo yakhel devaro” ti’a Torah in asut ahitah leh ipi ding’a “kekhol hayotze mipiv ya’ase” ti’a ahinsut kit a hintem - ti jong kicheh ta’n te.

Ohr Hakhayim Hakadosh in hitin asei e: “La Hashem” – P-thien a ding’a kiti chu kisun tahih hen lang “Ish ki yidor neder o hishava shevua…” ti’n kisun taleh lhagao lang toh kisai kitepna/kihahselna chu tahsa lang toh kisai kitepna/kihahselna toh a daan thakhat dan a igelkhah diuva ahi. Hinlah “la Hashem” ti’a ahung kisut a kuon lhagao lang toh kisai kitepna/kihahselna daan hohi tahsa lang toh kisai kitepna/kihahselna toh akibangpoi ti ahi.

Hetding chu tahsa lang toh kisai kitepna/kihahlsena hohi mihem in thilkhat bol ding igot, Torah le Mitzvot toh kisai lou ahiuve. Tichu Nidrei Khol ahiuvin ahi. Hinlah lhagao lang toh kisai kitepna/kihahselna ho ahiuleh vang P-thien toh mihem kikah, Nidrei Kodesh ahiuvin ahi.

Ohr Hakhayim in aseina’a Nidrei Khol ahitieng leh Torah hung’a ipi ihung hil uvem? “Lo yakhel devaro” – Lhagao lang toh kisai hitahih jong leh nakitepna chu palkeh da’n ti’a Negative Commandment lang’a ahung sei’a ahi. Hinlah nasuhbulhit nuom tahlou’a ahileh midang hung’a nakitepna/nakihahselna chu ahung suhlhap thei tina ahiye. Khazal ho’n aseinauva “lo yakhel devaro” kiti chu “hu atzmo lo yekhalel aval akherim matirim lo” tina ahi atiuve. Tichu akamcheng a kuon hung kondoh a chu amatah in asuhboh “lekhalel” abol theilou ding, hinlah iham ti’a akitepna/akihahselna chung’a chu kisihna anei tah’a ahileh midang in lekhalel/lehatir – alhaplhah peh thei ti ahi.

Langkhat a lhagao lang toh kisai kitepna/kihahselna - Nidrei Kodesh ahitieng iseima bang uva “La Hashem” kiti thucheng hin Nidrei khol toh akikah lhon’a lhekhenna ahung sem toh kilhon’a Torah hung’a hitahi ihung hil uva ahi: kekhol hayotze mipiv ya’ase (akamcheng a kondoh bang chun bol hen). Chunglang’a iseima bang uva hiche hi Positive Commandment – tobang’a bol ding thupeh lang’a che a ahitai. CHuti ahileh Torah in jong hitobang positive commandment chung’a chu asuhbulhit teina ding’a tielkhouna ahung peh a ahitan ahi. Ajehchu lhagao lang toh kisai ahi phat’a Torah in jong ahithei chan’a asuhbulhit ding chu adei a ahiye.

Ohr Hakhayim in aseina’a hiche Nidrei Kodesh hi Kedusha – lhangao lang’a thienthouna nei thil, tichu masanglai Beith Hamikdash dinlaiya Beith Hamikdash a man ding’a thil anakikatdoh ho kiseina jong ahi ati. Vetsahna a Pumgo-thilto to ding’a kitepna anei, Beith Hamikdash a manchah ding thil peh ding’a kitepna anei – hitobang dinmun ho’a kitepna hohi lhaplhah thei hitalou, khatvei nakat doh kalse kedusha anei tah toh kilhon a Torah in “kekhol hayotze mipiv ya’ase” ti’a ahung sei’a ahi atie .

Aipi hileh hiche nederim – kitepna/kihahselna ho’a kuon hi mussar heskel jildoh thei tamtah aum e. Chuche holah’a achallang pen tithei, Ba’alei Mussar ho’n eihil uchu ipi ham itileh hiche a kuon a hi mihem in ikam’a kuon hungdoh thil kiti’a kuon ichan a kiven poimo em ti ahiye.

Gemara Masechet Ta’anit Daf 4a mun’a Khazal ho’n hitin asei uve: Mi 3 in ahiloulam tah in thil anathum uvin; ni teni chu P-thien in aphalang in anadonbut in, khat ahileh vang ahiding dol tah’a athumlou ma bang chun P-thien in jong aphalang in anadonbut tapoi. Hiche mi 3 hochu – Eliezer eved Avraham, Shaul Ben Kish chuleh Yiftakh Hagiladi ahiuve.

Hiche mi thum hochun ipi athum uva Khazal ho’n “shelo kehogen – ahiloulam tah’a athum uva” asei uva hintem? Gemara ivet leh Khazal ho’n aseinauva Eliezer in Yitzkhak Avinu ding’a a-inneipi ding agapui’a chu twikhuh mun a iti kitepna anei em? “Koi nungah hileh ajah’a twi nei don sah in ti’a kathum a nasangong-sang hojieng jong donsah ing kate ti’a chu kapupa Yitzkhak ji ding hihen… “ ti’a kitepna anei a ahiye. Ahileh hilai mun’a chun a-elbai khattou hung tahen lang akitepna bang chun hung subulhit taleh Yitzkhak Avinu ji ding’a atibukimlou khat chun ahin pui jieng ding ham? Chuti ahitoh kilhon a Eliezer kitepna chu Khazal ho’n “shelo kehogen” atiuva ahi. Hinlah P-thien in akitepna chu aphalang in aguilhunsah in, apet pet chun Rivka imenu ahin solpeh e.

Chuma bang chun Shaul lengpa in jong kitepna anei kit in, koi hileh Goliath jou pen-pen a chu kachanu kapeh ding ahi ti’n kitepna anei kit e. Hilai mun’a chu thilha-sangah khattou hung tahen lang, ahilou leh Mamzer khattou hung tahen lang Goliath chu hung that taleh achanu chu aji ding’a apeh jieng ding na? CHuti chun Khazal ho’n hilai mun’a Shaul kitepna jong chu “shelo kehogen” ti’n asei uve. Hinlah P-thien in David chu apet-pet in ahin solpeh kit in, akitepna chu aphallang a suhbulhit peh in anaum kit e.

Langkhat a Yiftakh in ahileh Ammon mite chung’a gaal bol ding’a akondoh masang’a chu itobang kitepna ananei em? “Ammon mite chung’a gaal kagabol a, kajo jou’a kahung kile tieng ipi hileh kakelkot hin kallhah masapen pen a chu P-thien ding’a pumgo-thilto a kato ding “ ti’n kitepna ananei e. Ahileh hitobang dinmun a chu gancha thienglou – uicha, vohcha tou in analamto taleh P-thien ding’a thet umtah gancha-boh khat chu pumgo-thilto a ato ding a ham? Khazal ho’n aseinauva Yiftakh in chutachu ahiloulam tah’a kitepna anei toh kilhon chun P-thien in jong aphalang in adonbut tapo’n, gaal’a kuon ahung kile chun achanu ahin solpeh ta’n ahi.

Khazal ho’n aseibe nauva chuche phat laiya chu Gilad mun’a Pinkhas anaumlai phat ahi atiuve. Yiftakh chu Pinkhas heng’a che’a akitepna chu agalhaplhah thei a ahi. Hinlah agache tapo’n, akitepna’n akaan jing toh kilhon’a achanu chung’a chu itobang thil lhung em ti akicheh tapoi. Mefarshim khenkhat in achanu chu pumgo-thilto in atoh doh e atiuvin, khenkhat in ahileh mihem pumgo-thilto a to ding kiti chu Torah toh kikal ahitoh kilhon in pumgo-thilto lom-lom chun anatoh tapo’n hinlah mun khat’a achang in akhum in, chuti chun ahinkho lhung kei in ji-le-cha neilou chuleh amihem chanpi toh kivoplou hiel in anakhosa tai atiuve.

Tosfot ivet leh Ba’alei Tosfot ho’n hitin asei uve: Ipi atileh Yiftakh chu Pinkhas heng’a gachelou ham? Yiftakh chu Pinkhas heng’a achetahlou jong leh Pinkhas joh chu Yiftakh heng’a gache a akitepna chu agasuhlhahp peh mo ham? Ajehchu anilhon a chu kisemoto lhon a ahi. Yiftakh in kei Am Israel te chung’a thutan-vaihom, leng tobang kahi’n ipi ding’a Pinkhas heng’a kache ding ham amajoh kaheng’a hung ding ahi ati’n. Pinkhas in ahikit leh kei P-thien in amanchah thiemgao kahi’n ipi ding’a Yiftakh heng’a kache ding ham, amajoh kaheng’a hung ding ahijoi ti’n asei kit e. Chuta amani alenjo ding le aneojo ding kisemoto jeh chun khohelou nungah chapang khat in chuchan chu anathohlo ta’n ahiye. Chutoh kilhon chun achunglhon a gotna analhung in, Pinkhas ahileh P-thien shchina in adalhah lo’n, Yiftakh ahileh atahsa chung’a apeh-avou hochu abeh-abeh in akhelha uvin, hitichun ahinkho anabei e.

Ivet a ahileh ikamcheng’a kuon sohdoh thil kiti chu ichan a khamur a ham ti tamseilou a mudoh thei a ahi.

Langkhat a Rabbi Yitzkhak Aizik Khaver in hiche Gemara Ta’anit Daf 4a mun ahilchetna’a hitin asei e: Ish ki yidor neder… Hilai pasuk a hi tu’a Khazal ho’n aminphah u mi 3 – Eliezer eved Avraham, Shaul ben Kish le Yiftakh Hagiladi cheng amin u leh achung uva thilsoh ho remez (hint) hung kisun a ahitai. Ish , Hebrew lekhajen a איש, kiti thucheng a Alef hi Eliezer eved Avaham kiseina ahi’n, Yod ahileh Yiftakh Hagiladi kiseina ahikit in, Shin ahileh Shaul Ben Kish kiseina ahiye.

Ravpa’n aseina hiche mi 3 hohin kitepna ananei uva, ahilou lamtah’a kitepna anei u hijieng jong leh alah uva mi 2 – Eliezer le Shaul chu P-thien in aphalam in anadonbut in ahi. Hiche chu tuchung Parasha a kisun “lo yakhel devaro” tichu ahi’n; amani in akamcheng’a kuon aso lhon kitepna chu asuhboh lhon sang in ti’n P-thien ahung in ahung lhaplhah peh lhon e. Langkhat a “kekhol hayotze mipiv ya’ase “ – akamcheng a kuon sohdoh bang’a aboldoh ding kiti chu Yiftakh chung’a analhung ta’n, akitepna chu P-thien in ahiloulam tah’a adonbut peh in, gaal a kuon ahung kinungle chun achanu in analamto ta’n ahi.

SHABBATH SHALOM LEKULAM

39 views0 comments

Recent Posts

See All

Comentários

Avaliado com 0 de 5 estrelas.
Ainda sem avaliações

Adicione uma avaliação
bottom of page