DIN BIRKHATH ASHER YATZAR VE ELOHEI NESHAMA-
ASHER YATZAR LEH ELOHEI NESHAMA THANGVAHNA DAAN,
YALKUT-YOSEF, SHULKHAN ARUKH SIMAN (CHAPTER):- 6
9. Mikhat chun, jun ahilouleh eh thah jou, thangvahna aseiya, het khel jeh a, khum kha na a “rofe kol basar umafli la’asoth” ti khel a “rofe kol basar” bou aseiya, “umafli la’asoth” asei hei khah a ahileh, avella thangvahna athah sei kit angai poi. (safek berakhoth leha kel)
10. “Asher yatzar” thangvahna sei petna, khut thih hul bol got louding ti hi, thil pha leh thil dih ahi. Chi chung chang bouva hilouva, ipi thangvahna isei pet hileh, thil danga kisah boi ti, bolgot lou helding ahi. Mikhat chun, akhut akithih hul aleh, “asher yatzar” thangvahna hoi deuva asei theiding, akihet aleh, khut kithih hul masat henlang, chujou tengleh, “asher yatzar” thangvahna sei hen. Khankhat sei dung juiya, khut thih hul toh, thangvahna “asher yatzar” hin kijop matna anei uvin, thangvahna sei petna khut kithih hul ding ima aboi poi, tin asei uve. Hijeh achu, koi hileh “asher yatzar” thangvahna sei petna, akhut kithih hul a chun, kingap nading anei un ahi.
11. Mikhat chun jun athah a, jun thah jou thangvahna “asher yatzar” aseiya, chujouva aloi dang, jun thah jou khat in, amapa koma jun thah jou thangvahna “asher yatzar” ama hoptha dinga avella ahin seipeh dinga, angeh aleh, aseipeh thei louding ahi. Halakha a, eima in ibol jou nunga jong, midang adinga bolpeh kit thei ahi akiti vanga, hichu mitzvah bol nadinga thangvahna (birkhat hamitzvoth) chung chang abou kiseina ahi in, hinlah, kiphathu seina thangvahna (birkhath ha shevakh) chung chang avang, hiche daan hi aki jui pon ahi.
12. Mikhat chun, jun ahilouleh eh thah jou thangvahna “asher yatzar” asei heimil a, taona nei chai jou nunga ahin geldoh aleh, khankhat in, hiche thangvahna “asher yatzar” chu aseithei tah louding, ajehchu taona (amidah) sunga damtheina taona (birkhath refa’enu) aseipa chun ahoptha ahitai, tin asei uve. Halakha ahi aleh, taona (amidah) sunga, damtheina taona (birkhath refa’enu) kisei chun, jun ahilouleh eh thah jouva kisei thangvahna “asher yatzar” chu ahoptha pon, taona aneichai jou tengleh, jun ahilouleh eh athah jouva konna minute 72 ana pel nailouva leh, thangvahna “asher yatzar” chu aseiding ahi.
13. Jingkah hung thoudoh khat chun, jun ahilouleh eh thah nom na, ngei chatna lentah anei aleh, im lou hel a, akin thei penna gapam pot ding ahi. Ahin, achih thei ngai chu, khutsil nailou ahijeh a, atahsa ho atham khah lou nadinga, hoi deuva akiven ngai ahi. Hiche jingkah hung thoudoh khat chun, jun ahilouleh eh thah nom na, ngei chatna anei beh seh louva leh vang, khut akisil masat a chujouteng leh, ol tah a latrine a galut thei ahi. Hitia chu abol aleh, vangbohna akimu ding ahi. Ahin, daan dung juiya, khutsil masanga, latrine a lutna, jun leh eh ga kithah doh a, chujou tengleh, khut kisilding phal ahi chuleh inasei tauvin, daan dung juiya, khutsil masanga von kivon ding jong, phal ahi.
14. Jaan imut lai tah a, nung imut kit dinga mikhat chu, jun ahilouleh eh thah dinga, hung kithou doh a, jun ahilouleh eh aga kithah a, khutsil louva nung imut pai ding ati aleh, thangvahna “asher yatzar” seitheina phat minute 72 pel man ding ahi aleh, akhut chu apetna akisil ding, thangvahna “asher yatzar” aseiya, chujou tengleh, nung imut kitding ahi. Ahin, khutsilna ding twi (water) chu mun gamlha a um ahilouva leh, khut akisil aleh, nung imut kit thei talou ding ahi aleh vang, hiche dinmun a hi, akhut chu thil kisuh theng nathei thil pouva, akisuh theng a, thangvahna “asher yatzar” aseiya, nung imut ding ahi.
15. Jun ahilouleh eh thajou khat, latrine akonna ahung potdoh a, khut akisil masanga kadish ahilouleh kedushah kisei ajah a ahileh, akhut chu kisuh theng nathei thil khat pouva aki thih theng a, kadish ahilouleh kedushah kisei chu, adonbut ding ahi. Chuma banga chu, Jun ahilouleh eh thahjou khat, latrine akonna ahung potdoh a, khut akisil masanga kolphe vah (lightning) amu ahilouleh van gin (thunder) ajah a ahileh, akhut chu kisuh theng nathei thil khat pouva aki thih theng a, khutsil nai hih jongleh, kolphe vah mu na thanvahna (oseh maaseh bereshit) ahilouleh van gin jahna thangvahna (shekokho ugvuratho ma’le olam) aseiding ahi.
16. Jingkah sih leh, birkhoth hashakhar a thangvahna um jouse, abonna akiseiyin, jaan khovah keiya imu louhel a um hon jong, jingkah tengleh, khutsilna thangvahna “al netilath yadayim” tailou, adang se abonna, asei un ahi.
17. Birkhoth hashakhar a kisei, thangvahna “Elo-hai neshama” hi, H-shem in ilhagao (neshama) u loupitah, eisep peh u chunga, chuleh hiche lhagao chu jingkah tengleh, inung thodoh kit thei nadiuva, ihin nung peh u chunga, H-shem koma kipathu seina ahi. Hiche thangvahna isei uhin, ei geldohsah nom uchu, inu oisunga ina kijil masang uva, H-shem komma kihah selna ina nei u chu ahi. Tidan chu, mihem lhagao khat, hiche leisetna ahung kum lhah ding tengleh, H-shem in, hiche lhagao mihem pa ahin peh chu, mihem pa in hoitah a, thengthou tah a avending leh, a chonset sah lou nadinga, H-shem in akihah selsah ji ahi. Daan dung juiya, hiche thangvahna hi, ama masanga kisei thangvahna “asher yatzar” toh sei kop ding tei tei angai pon, hiche thangvahna “Elo-hei neshama” hi Barukh atah…. a akipat lou najeh ding tei tei angai pon, hiche thangvahna “Elo-hei neshama” hi Barukh atah…. a akipat lou najeh chu, kipathu seina thangvahna (birkhath ho’daah) ahi jeh ahi. Ajeh chu, kiphathu seina thangvahna (birkhath ha’daah) ho jouse, Barukh atah….. a kipan ji lou mong ahi. Hijeng jongleh khankhat in, thangvahna “asher yatzar” toh seikop ding ngai ahi, ati jeh uva, ngeidan jouse dung juiya suh bulhit thei nadinga, thangvahna “asher yatzar” toh seikop ding thil hoi leh thil pha ahi. Ahin, koi tabang khat in, thangvahna “asher yatzar” toh thangvahna “Elo-hei neshama” asei koplou, imu aleh, pho ding angai pon, hiche abol chu, Maran shulkhan arukh ngeidan tabang ahi in, aboina ima aum poi.
18. Khankhat in chondanna jingkah sehleh, birkhath hashakhar aseiteng uleh, khat in abonna aseiya, adang hon, “amen” tia adonbut uva, chujou tengleh, “amen” tia donbut ho lah a khat in, asei kitna, adang hon “amen” tia ale donbut kit uva, hitia chu kilhah tou peh u ahi. Hitia bol chondan ho chu, anjou khat leh, khat le khat kihoptha to ahitai tia gelkhah a, athil bol uchu adih lou danna gagel khah got louding, ajehchu thangvahna seipan, angai ho hoptha dinga kasei ahi tia gel jongleh, angai hon amapa thangvahna seina akonna kihoptha dinga, lunggel anei loujeh uva, ima boina aum poi. r
Comments