Gideon Haokip Hilkhoth tzitzith/Seder atifath tzitzith- Tzitzith daan leh asilding daan daan, Shulkhan arukh, yalkut-yosef, siman (chapter):- 8
1. Mikhat chun, pon ning li nei, kel ngoi mul (tzemer/wool) ahilouleh tupat (pistan/linen) akonna kisem anei a, hichu akivon dinga leh, a pon ning li ho a chu tzitzith akhi ding, Torah akonna thupeh (positive commandment) ahi. Koi hileh, tzitzith mitzvah ching thei tah a jui a chun, H-shem umpina akimu ding ahi. Hiche tzitzith mitzvah aloupi dan chu, mitzvoth (613) jouse toh akibang in, Torah a akiseima banga, " Namu tengleh, H-shem thupeh jouse nageldoh a, chuleh nasuh bulhit ding ahi" tin akisun in ahi.
2. Koi hileh, tzitzith khi ngai von, tzitzith khi louva kivon achun, Torah akonna bolding thupeh (positive commandment) apalkeh ahi. Koi hileh tzitzith khi ngai von, khi louva kivon a chun, Torah akonna bolding thupeh (positive commandment) chi nga (5) apalkeh e, tin Gemara in aseiye. Ahin tua kisei hi, avon chu kel ngoi mul ahilouleh tupat akonna kisem ahi alebou tina ahi in, hinlah thil dang akonna kisem ahi alevang, Torah akonna bolding thupeh apalkeh pon, Rav te akonna joh bolding thupeh ( positive mitzvath derabanan) apalkeh ahi.
3. Shakharith a, keriath shema seipet chuleh taona (Amidah) nei pet tengleh, ichunga tzitzith aum jing ding, chihthei ngai ahi. Ahithei aleh, hichu talith katan (aneo jo pa) hilouva, talith gadol (alen jo pa) joh ahiding thilpha ahi. Hijeng jongleh, iti ham khatna, mikhat chun talith gadoh anei louva, talith katan bou akivon a, talith gadol aga hol dinga leh, keriath shema seiphat chuleh taona (Amidah) manphat, pel man ding ahi a, ahilouva leh, japi (minyan) a taona (Amidah) manding, achan ding ahi aleh, kinom sot louva, talith gadol um louva keriath shema aseiding chuleh taona (Amidah) jong aman ding, talith katan akivon chu, talith gadol khel a, anganse ding ahitai. Talith gadol aum na a ahileh, talith katan sanga ajah ding, deisah umjo ahi, ajehchu kak kah tengleh, talith katan chu, a mitzvah suh bulhit nadinga, ajat ( apon size) ana lhinglou meithei, khuti leh a mitzvah ima kisuh bulhit lou ahi in, hijeh a chu talith gadol umna a, amajoh manding ahi.
4. Taona service kichaina "aleinu leshabeakh" seichai tokah a, talith gadol sutlhah louding thil pha ahi. Ahin, iti ham khatna mikhat chu akino a, tekahna a anatoh nading mun adel ngai ahi aleh vang, "aleinu leshabeakh"sei masang hijong leh, talith gadol akisutlhah ding, phal ahi. Talith gadol chu, tefilin sut lhah jou teng lebou, sutlhah ding ahi.
5. Jaan imut ding tengleh, talith katan sutlhah louva, imut piding thil pha leh thil dih ahi, hichu chondan jong ahi. Ahin, asat (warm/kham) beh seh jeh a, talith katan imut piding ahah sat aleh vang, imut masanga kisut lhah ding, phal ahi. Hiche va jong, koi hileh, kiham bolna aneiya, sa (warm/kham) jongleh, talith katan sutlha louva imut pi chun, H-shem akonna vangbohna (blessing) akimu ding ahi.
6. Mikhat chun jaan a talith katan aimut pi aleh, jingkah tengleh talith katan chunga thangvahna asei louding, talith gadol sil nadinga thangvahna "lehith atef be tzitzith" asei tengleh, talith katan akivon jong chu, ahoptha sah ding ahi. Ahop tha nadinga, talith gadol chunga thangvahna asei tengleh, talith katan akivon chu akhutna atham le le ding, angai poi. Ahin, mikhat chun jaan aimut ding konna talith katan akisut lhah alevang, daan dung juiya chu jingkah tengleh, talith katan chunga jong, thangvahna aseithei ahi in, hinlah chondanna talith katan chunga, thangvahna akisei ngei pon, talith katan chu, talith gadol, akihop tha sah jin ahi.(tua kisei, daan dung juiya talith katan chunga thangvahna aseithei kiti chu, talith katan chu, thangvahna seithei nadinga a size jat lhing tina ahi in, hiche a size jat chung chang halakha hi, siman 16 ilhun teng uleh, isei chen dingu ahi.)
Yorumlar